خلطبيطة بالصلصة وأفتخر

لما اكتشفت ان عندى ADHD اول حاجة جت فى بالى بابا الله يرحمه، كان بيتقال عليه مبيركزش ومبيجمعش ودايما بينسى حاجته فى كل مكان لدرجة انه مرة نسى أمى شخصيا عند الدكتور وروّح البيت منغيرها! 😂 وكان بيتحكى عنه انه كان طفل شقى واندفاعى وفشل فى دراسته ودخل تربية رياضية لانه كان بيحب الرياضة ودى نقطة تحول مهمة فى حياته معتقدش ان هو نفسه ادركها ابدا لحين وفاته: هى ان دخوله مجال الرياضة هو اللى صحح مسار حياته وعمل امتصاص لطاقة فرط الحركة اللى عنده ووصله لدرجة كبيرة من النجاح فى شغله بعكس توقعاته الدراسية، وده لانه بيساطة كان بيعمل حاجة بيحبها بالتالى كان بيركز فيها كويس اوى (ال ADHD معندوش نقص فى الانتباه، لكن عنده عدم قدرة على تنظيم المشاعر والانتباه، فلما بيحب حاجة بيركز فيها جدا وبينجح فيها بشكل فوق العادى، لكن ده بيكون على حساب اهمال حاجات تانية بتخرج تلقائيا برة دايرة تركيزه واولياته زى المواد الدراسية اللى مش بيحبها مثلا)

انا بحكيلكم القصة المختصرة دى عشان فيه كام حاجة كده لازم نفهمها عن ال ADHD الجميل ده اللى انا بعتبره زى ما سبق وذكرت "سوبر باور" بمعنى الكلمة.

الحقيقة الاولى: ال ADHD اضطراب وراثى .. يعنى لو اتأكدت انه عندك، تأكد ان فيه حد من عيلتك عنده قبلك وفى احتمالية عالية انك انت اللى تورثه لاولادك. مثلا انا اكتشفت انى ورثته من ابويا لكن الحمد لله بنتى مش وارثاه منى.

الحقيقة الثانية: لانه اضطراب وراثى چينى فلأ هو مش بيجى على كبر بل بنتولد بيه لكن ممكن نعيش بيه عشرات السنين غير مشخصين زيي وزى بابا كده.

الحقيقة الثالثة: هو اختلاف عصبى، يعنى تركيبة دماغك مختلفة عن تركيبة دماغ بقية الناس الغير مصابين بال ADHD. فى الواقع العلماء مقسمين البشر حاليا لنوعين، نوع بيسموه neurotypical، او "عصبى نموذجى" و neurodiverse، او "عصبى مختلف"، ودى كلمة لطيفة بيندرج تحتها حوالى ٩ اضطرابات عصبية مختلفة من ضمنها ال ADHD وال OCD والتوحد بكل اطيافه والتوريت والدسلكسيا (صعوبة التعّلم) وغيرها. وفيه بعض الابحاث بتقول ان مخ اللى عنده ADHD بيكون اصغر حجماً من المعتاد (وده ملوش علاقة اطلاقاً بالذكاء، بل بالعكس معظم الابحاث بتقول ان ال ADHD بيتمتعوا بذكاء فوق المتوسط وقدرة عالية على الابداع).

الحقيقة الرابعة: بسبب التركيبة المختلفة لمخ الشخص ال ADHD، بيحصل خلل ما فى معالجته لهرمون الدوبامين، وهو الناقل العصبى المسؤول عن التحفيز والتركيز والمكافأة - ايوة هو هرمون السعادة اللى تامر حسنى بيغنيله ده … لأ مش حماقى، دوكها بيغنى للادرينالين ودى حاجة تانية 😂 - وعشان كده ال ADHDer’s بيدوروا على اللى يحفز لهم الدوبامين زى مدمنين الهيروين بالظبط، وده السبب اللى بيخليهم عمالين كل شوية يتنقلوا من هواية لهواية او شغف لشغف، فى محاولات بائسة للوصول لنشوة الدوبامين اللى بتيجى مع حلاوة البدايات دى 😍🤩 بعدين نزهق والدوبامين يروح 🤯، فنرجع ندور على حاجة تانية جديدة ومثيرة وهكذا.

بسبب الموضوع ده تحديدا انا اتعلمت كم من المهارات يمكن انا نفسى مش هعرف احصرها بس خد عندك دول: فى الرياضة لوحدها لعبت كرة سلة وسباحة وتنس ارضى وتنس طاولة وسكواش. بركب موتوسيكلات بقالى ١١ سنة، وعندى مدرسة تعليم سواقة موتوسيكلات. بحب الرسم وكنت شاطرة فيه جدا زمان. جت لى فترة كنت بصور فوتوغرافيا وعندى كاميرا بروفيشينال ودرست فى المجال ده شوية، وبعمل فيديو ايديتينج كده على خفيف. اخدت كورسات فرنساوى واسبانى وايطالى. اتعلمت ترميم كتب قديمة وعملت كذا مشروع حلوين بالجلود، درست فقه وتجويد لسنوات وكنت بدرس قرآن للاطفال. فى الموسيقى درست الجيتار لسنوات والطبلة والكمان والكيبورد لفترات قصيرة، سافرت ما لا يقل عن ١٥ دولة وعشرات المدن وكتبت ونشرت ٥ كتب فى ادب الرحلات. درست تغذية ومعايا شهادة معتمدة واشتغلت بيها فترة كنيوتريشن كوتش. بشتغل بصورة اساسية فى ادارة البرامج والمشاريع وبدى ترينينج وكوتشينج فيهم كمتطوعة بقالى سنين.

كلها زى مانتو شايفين حاجات لطيفة مالهاش اى علاقة ببعض اطلاقا مطلقا 😀 فرك بلا هدف 😂 لكن لازم اعترف انى قبل التشخيص بال ADHD كنت شخص عنده احساس شبه دائم بالفشل لانى عملت كل الحاجات دى فى حياتى ومكملتش فى ولا حاجة فيهم تقريبا وبالتالى كنت بعتبر نفسى quitter لكن بعد التشخيص (يعنى فى اقل من سنتين) تحولت ١٨٠ درجة لواحدة فخورة بالخلطبيطة بالصلصلة اللى هى شخصيتى دى وبقيت باعتبر كل ما سبق هو مهارات بقيت بعرف استغلها كويس كادوات للنجاح.

ال ١٨٠ درجة شيفت فى ال mind set دول بفضل التشخيص بس؟ مجرد ان اتقال لى انتى عندك ADHD؟ آه .. اقسم بالله آه! هى فعلا سويتش فى العقلية .. "انا مش فاشلة ولا quitter انا واحدة عندى سوبر باور." بالبساطة دى؟ اه اومال انت فاكر ايه؟ 😂😂😂

المرة الجاية هحكيلكم اكتر عن الفوائد التانية للتشخيص اللى فتحت عينى على حاجات كتير اوى وساعدتنى احول حياتى للافضل!