كنت شاكّة مع أني كنت متأكدة

حصل ايه بعد كل الشك العميق اللى فضل يزيد يوم عن يوم بان عندى adhd؟

اولا انا فى الفترة دى كنت متابعة مع **ثيرابيست** كده كده .. فرحت قلتلها انا شاكة فى كذا كذا وعايزة اعمل **اختبار** .. فالست الحقيقة مكانتش مقتنعة وشايفة ان من معرفتها الشخصية بى من المستبعد ان عندى adhd بس انا صممت (**ماهو الشك هيموتنى**).

المهم عملنا سوا اختبار اعتقد اسمه **Connor’s adult adhd rating** او **"كارس"**. جدير بالذكر هنا مفيش اختبار محدد وحاسم بيشخص ال adhd بنسبة ١٠٠٪؜ .. بل الموضوع اصعب كمان فى الكبار لان الطب النفسى بجلالة قدره مابتداش ياخد باله ان الاضطراب ده موجود عند الكبار غير فى اوائل التسعينات، قبل كده كان الدكاترة مفترضين ان دى حاجة بتيجى للاطفال وان الاعراض بتنسحب تلقائيا بعد سن الطفولة ودخول مراحل عمرية متقدمة!

طيب دلوقتى التشخيص (اللى برضو مش حاسم ١٠٠٪؜) بيحصل ازاى؟ بيتم عن طريق بعض الادوات اللى بيستخدمها الدكاترة والمعالجين النفسيين، منها **الانترفيو الشخصى** او **التقييم عن طريق فهم تفاصيل سلوكيات المريض على مدار جلسات متعددة**، ومنها الاختبارات المعترف بيها زى اختبار كونور اللى انا عملته.

الاختبار كان طويل، بيتطلب انى اجاوب عن **٦٦ سؤال** بقيّم فيهم‎ سلوك من سلوكياتى من حيث مدى تكراره، مثل: “أبدًا”، “أحيانًا”، “غالبًا”، أو **“دائمًا”**.

اسئلة زى: **هل تجد صعوبة فى البقاء جالسا لفترات طويلة؟ هل تقاطع الآخرين بشكل متكرر؟ هل تشعر بالاحباط بسهولة عندما لا تسير الامور كما تريد؟**

طبعا الاسئلة دى ممكن ناس بتقرا البوست ده دلوقتى هتجاوب عليها ب "دائما" او "غالبا" مثلا فتشك ان عندها adhd .. فاحب اطمنهم ان الموضوع مش بالبساطة دى، لازم مجموع الاسئلة كلها على بعض يحقق score معين عشان نقدر نقول ان **"غالباً"** عندك مؤشرات adhd وده هيرجع لتقدير الثيرابيست او الدكتور. المجموع المفترض كحد ادنى للتشخيص ده هو **١٦٠ درجة** .. انا الحمد لله نجحت بامتياز مع مرتبة الشرف وجبت **٢٠٤!** الثيرابيست نفسها كانت مستغربة واصلا هى اللى جاوبت على تلت الاسئلة بنفسها بحكم معرفتها بيا وبسلوكى!!

الفكرة ان الموضوع فعلا **مخادع** .. لان ممكن بعض الاعراض الاشهر متكونش واضحة اوى بس فى المقابل فيه عشرات الاعراض التانية واضحة جدا بس لانها مش اعراض شائعة فممكن متتلاحظش بسهولة.

اللطيف ان من الاسئلة دى انا عرفت اعراض مكنتش اعرف اصلا انها من اعراض ال adhd .. اكترها صدمة بالنسبة لى هى **الحساسية للضوء المباشر والاصوات العالية** .. لانى طول عمرى بعانى فى نومى بسبب الحاجتين دول .. لو فيه نقطة ضوء واحدة معرفش انام، خفاش آدمى متحرك وبفضل الحركة فى الظلام حرفيا. اما الاصوات فحدث ولا حرج، نومى خفيف جدا ولو حد مر من قدام باب اوضة النوم بس ممكن اصحى من نوم عميق!

طيب انا استفدت ايه لما اتشخصت؟ ده كلامنا فى البوست اللى جاى باذن الله