سنة 2023 تمّ تشخيصي باضطراب تشتّت الانتباه وفرط الحركة المعروف بالـ ADHD. ودي تقريبًا كانت أحسن حاجة حصلت لي في رحلتي النفسية، وفي الحياة عمومًا! وهقولكم ليه في آخر البوست.
في الواقع، مسمّى ADHD نقدر نعتبره سبب مباشر في إن ناس كتير أوي بيكونوا undiagnosed أو misdiagnosed (يعني غير مشخصين أو متشخصين غلط)، زيي أنا بالضبط لما اتشخصت بيه وأنا “شحطة كبيرة كده” معدّية الأربعين من عمري! (أيوه المفاجأة إنه بيكون موجود عند الكبار مش الصغيرين بس!)
ليه بقى؟
لأن الناس دايمًا بتفتكر اللي عنده ADHD هو الطفل الشقي اللي عمال يتنطّت على الكنب والحيطان ومبيعرفش يقعد على بعضه، وبالتالي تحصيله في المذاكرة صفر وغالبًا بيكون فاشل دراسيًا. لكن الحقيقة غير كده خالص.
الـ ADHD معناه إن عقلك نفسه بيكون عامل زي السيرك 🎪
فيه مية حاجة بتحصل في نفس الوقت، وكل حاجة عايزة تبقى في مقدمة انتباهك!
سواء كنت بتحاول تركز في شغلك، أو تفتكر كنت رايح فين لما فتحت التلاجة ٣ مرات في أقل من ٥ دقايق 🤔
وده اللي بيولّد الحركة الكتير، لأنك ممكن تعمل ٥ حاجات مختلفة ورا بعض في وقت قصير جدًا.
أما عن “تشتّت الانتباه”، فالحقيقة العكس تمامًا برضو!
اللي عنده ADHD عنده قدرة شبه خارقة على التركيز بنسميها hyperfocus، بس عنده مشكلة شبه خارقة برضو في تنظيم وتحديد أولويات التركيز ده.
بس مش كل حاجة في الـ ADHD سلبية ❤️
أنا شخصيًا، على مدار السنة وشوية اللي فاتوا، اتعلمت حاجات كتير أوي عن نفسي، وبقيت أبص للموضوع على إنه سوبر باور لازم أعرف إزاي أستغلها كويس في حياتي بدل ما أسيب الجانب السلبي هو اللي يتحكم فيها.
وهحكيلكم في البوستات الجاية أكتر عن إيه اللي خلاني أشك إن عندي ADHD وعملت إيه بعدها.
0 comments